«Doxea», «(te) doxei», verbo «dovère»

El verbo dovère no l’è propio veneto veneto. El sarìa on itajanismo, che gaveo catà su e che doparemo in alternanza co verghe da.

Al’inperfeto, insieme co mi dovea, ti te dovei, ecc. ghe anca doxea, doxei, co la /z/. Sentì chì cosa ch’el dixe Filippo Bonfante in Grammatica del dialetto veronese (Cierre edizioni, 2013, p. 78):

"Dovér" ha un uso limitato a determinati contesti, per lo più colti, specie al presente. Più usato l’imperfetto "mi dovéa", "ti te dovéi (esiste anche la forma doséa/doséi ecc.)" [...].

«Èsare in via (fare calcosa)»

Noantri veronexi, soratuto dela Basa, doparemo asè èsare in via fare calcosa insieme co èsare indrio fare calcosa. Anca la Grammatica del dialetto veronese de Filippo Bonfante (Cierre edizioni, 2013, p. 77) la dixe che le do forme perifrastiche i è conpagne:

"Son drìo magnar" opp. "son invià magnar" = sto mangiando (la seconda letteralmente "sono avviato a mangiare").

Pol darse che su drio / indrio me sbalia mi, ma me pare che se dopara piasè indrio che drio.

«Rantegare»

Rantegare o verghe el rantego se dixe de cuei che i fa rumore quando che i tira el fià, come se i fusse in via morire. L’è ’na roba che fa, par dire, cuei cani che ghe manca on toco de muxa, come i carlini.

«Dognimodo»

Ardelo chì l’averbio che doparemo tuti noantri veneti, elo vera? Ben, in tajan el sarìa comunque, che l’è el scurzamento de comunque sia. ’Na olta i puristi i dixea che no se doxea mia doparare comunque come averbio, ma oramai…

«Spelagrarse via»

Chesta chì l’è nova nova: spelàgrete via! se dixe, come se se dixese descàntete, svéjete fora!. Vualtri savì che la pelagra el jera on male che gavea cuei che magnava solo che polenta, e cavarse fora da ’sto male la jera ’na bela liberazion.

«Nar zò de brenton»

Cuando che se va zo de brenton se dixe robe che no se gavarìa mia da dire, se spande scartozzi senza seno, fora de raxon.

El brenton, tra l’altro, el sarìa anca ’na sorta de mastela granda, ’na bota tajà a metà, ’ndo che se ghe metea le graspe.